Grand palc per «Prefix» e las Liricas

In venderdi saira d’eira il parc dal Kulm a San Murezzan fermamaing i’ls mauns dals rumauntschs. Organiso da la Lia Rumauntscha haun suno ils «Prefix» ed eir las Liricas Analas sün ün palc immens ed inchanto il numerus public.

Aunch’ün ura e lura cumainza il concert dals «Prefix», la band indigena da rock dür rumauntsch. Oura sül grand plazzel da festa davaunt il palc immens ho lö la ceremonia da medaglias dal slalom gigant dals hommens. L’atmosfera i’l public es allegra, surtuot tals Austriacs chi paun festagier hoz üna victoria dobla. Duos pass dasper il palc discutan ils commembers dals «Prefix» auncha illa gardaroba, chi chi’s metta cun sieu instrumaint inua. Las dimensiuns dal palc sun enormas ed algordan a concerts dals grands da la scena da musica i’ls stadions da concert giò la Bassa. «Nus ans mettains sü scu i’l local da prova», disch ün, intaunt ch’ün oter es da l’avis, cha quist palc pussibiltess ün oter «Line-up» scu da solit. Ma, chi sto a dretta, chi a schnestra da Fredy Muriset e sia batteria? Ils «Prefix» sunan daspö üna dunzaina d’ans illa furmaziun Andri Casty vusch, Curdin Urech guitarra e vusch, Christoph Casty bass, Fredy Muriset battaria, Marco Niggli keyboard e Rico Puorger guitarra. Cuort aunz il concert disch il chantadur Andri Casty da Zuoz: «Quist co es per nus quell’occasiun e scu indigens es que insomma ün mumaint tuottafat speciel da’ns pudair preschanter co sül grand palc dal Kulm.» Zieva ün lung soundcheck paun ils «Prefix» finelmaing der gas e lascher sclinger las cordas da lur instrumaints, las tastas ed eir lascher vibrer las pels dal tambur. Cun lur repertori da chanzuns rumauntschas dals duos discs «Sgratta’m» dal 2006 ed «Adrenalin» dal 2011 haun els subit eir in mauns il public chi’s ho raduno in üna granda fuolla davaunt ils giatters da la barricada chi separa il public dal palc. Cun «Gloria» resuna düraunt il concert eir üna da las chanzun nouvas. E grazcha a la registraziun da video chi ho lö düraunt il concert, paun ils «Prefix» profiter d’üna cumparsa audiovisuela chi’s ho laveda e, chi da solit as vezza – auncha üna vouta – be ils stadions grands. Duos grandas tailas i’l fuond dal palc muossan ils purtrets dal viv e pussibilteschan d’insomma vzair da daspera ils ses musicists da «Prefix».

Videoregistraziun sün basa da crowdfunding

Las registraziuns da tun, video e fotografias dessan gnir ütilisedas per publicher prosmamaing üna DVD cal concert dals «Prefix». Per finanzier quist proget haun ils musicists preschanto lur idea sülla plattafuorma da sustegn crowdfunding. Fin hoz haun els ramasso già bod tuot l’import neccessari da raduond 2500 francs. In möd professiunel s’haun ils «Prefix» però concentros per prüm plainamaing sün lur concert e lascho registrer a Gian Reto Picenoni ed a Claudio Gotsch ils purtrets. Zieva il concert as radunan ils «Prefix», stracs e cuntaints, backstage illa gardaroba. «Enorm», recapitulescha il chantadur Andri Casty, «ün tel palc, co nu sest pü che fer». Eir Rico Puorger e Christoph Casty, chi düraunt il concert sun ieus a spass cun lur instrumaints fin ourasom il palc ed eir oura vers la fuolla dals fans, sun inchantos: «D’avair üna vouta taunt lö es incredibel, co at stoust pel prüm adüser landervi. Que nun es nimia uschè simpel da chaminer e suner al listess mumaint», disch Rico Puorger auncha ün zich ourd’ fled. Pella finischun ed il punct culminant da la saireda rumauntscha sül Kulm haun pissero las «Liricas Analas», ils hip-hoppers Grischuns cuntschaints sün livel internaziunel.

Ils hip-hoppers Grischuns, las Liricas Analas, haun pissero pel punct culminant da la saireda rumauntscha sül Kulm.

La band da rock dür indigena «Prefix» ho profito da l’occasiun e lascho registrer il concert als champiunedis mundiels da skis sün DVD. fotografias: Jon Duschletta