Marketing ed indentificaziun persunala

Quant important es il PNS pels cumüns da la regiun?

La preschentscha dal Parc Naziunal Svizzer (PNS) in blers mezs da massa es enorm. Da quella preschentscha profita impustüt il cumün da Zernez, il qual es «la porta dal parc naziunal». Però tuot la regiun po profitar in occasiun da l’anniversari da 100 ons dal plü vegl parc naziunal da las Alps e da l’Europa.

«S’idendifichar amo plü ferm»

«Il giubileum dal PNS pussibiltescha üna publicità ourdvart gronda per l’Engiadina, in special per l’Engiadina Bassa e la part suot da l’Engiadin’Ota, sco eir per la Val Müstair», disch Jon Domenic Parolini, capo cumünal da Scuol. Chi’s tratta d’üna publicità sco regiun cun ün grond potenzial natüral ed üna regiun chi dà vi e plü grond pais ad ün agir persistent. «La reputaziun sco regiun cun üna politica persistenta cun la natüra es importanta», declera’l. Cha quista valur gnia tscherchada vi e plü pel turissem da stà: «Quai es stat fin uossa fingià nossa cumpetenza e nossa fermezza. Quella as tratta però amo da rinforzar ils prossems ons.» Il giubileum güda, tenor Parolini, a rinforzar quist image. Tras las fusiuns da cumüns in Engiadina Bassa dvaintan a partir da quist on chi vain tuot ils abitants da Sent insü ’abitants da cumüns dal parc’. Las activitats actualas da giubiluem güdan a plü blers indigens da s’identifichar plü ferm co finqua cul PNS», manaja’l.

Grond plaschair da quist giubileum

Ch’ultra da quai saja il proget dal gö liber «Laina viva» eir ün fich bun mez per gnir plü dastrusch a l’idea e l’istorgia dal parc e güda a promouver l’identità cul PNS. Ün giubileum da 100 ons pussibiltescha da verer inavo sün las grondas ouvras chi’d han rablà a fin avant 100 ons e süls effets positivs cha quai ha gnü per la regiun. «Tras mia stretta coliaziun cun l’istorgia d’ütilisaziun dals gods i’l territori dal parc, sco tema da mia dissertaziun, n’haja ün special grond plaschair da quist giubileum», intuna Jon Domenic Parolini. «Quai es eir ün regal da finischiun dürant meis 15avel ed ultim on da mia carriera sco capo cumünal da Scuol», declera’l. Il PNS saja e resta üna pütta importanta eir per l’economia per la regiun, «e quai fa plaschair eir a mai sco directer futur dal departamaint da l’economia publica dal chantun Grischun», conclüda Parolini.

«Il parc es e resta fich important»

«Il PNS es per nos cumün adüna stat e sarà eir in avegnir da grond’importanza», disch René Hohenegger, president cumünal da Zernez. Cha cun quist on da giubileum saja il parc evidaintamaing dvantà amo plü cuntschaint e cha tuots possan profitar da quai. «Grazcha als mezs da massa es Zernez preschaint fin dalöntsch sur ils cunfins da nossa regiun oura ed il nom dal cumün da Zernez tocca simplamaing pro al parc naziunal», intuna’l. Cha quist’enorma preschentscha saja gratuita ed in quel sen eir impajabla. «Pel mumaint s’ingascha eir il cumün per cha tuot funcziuna bain a la gronda festa da giubileum dals prüms avuost e quai cun metter a disposiziun lavuraints da cumün o spordscher man in otras chosas praticas», disch el. «Però nus fain quai gugent e sperain da pudair contribuir in quist möd almain ün zich a las grondas sfidas cha’ls respunsabels dal PNS han tut sün sai cun organisar quista festa», declera’l.

Ün regal d’anniversari dal cumün

Important es per René Hohenegger eir il proget d’energia «Zernez energia 2020», chi’d es gnü lantschà in cumün sco regal al Parc Naziunal Svizzer: «Grazcha a quel proget vulain nus spordscher a nos giasts fin da l’on 2020 be amo energia netta e regenerabla», declera’l. Cha quist intent as cunfetscha cul pensar dal PNS e saja perquai important per la collavuraziun ventura e per nüzziar sinergias preschaintas a favur da tuot la regiun. «Culla realisaziun da quist proget po il PNS spordscher sia natüra intacta e netta als giasts e nus in cumün pudain far reclama pro venturs giasts cha tuot quai ch’el gioda in cumün sco mangiar, far la duscha, s-chodamaint ed oter plü, d’eriva dad energia netta e regenerabla», intuna’l.